هێزەکانی ئیتلاعاتی سوپای پاسداران ژینگەپارێزێکی خەڵکی مەریوانیان دەستبەسەر کرد.

بەپێی ئەو زانیارییانەی بە تۆڕی مافی مرۆڤی کوردستان گەیشتووە، ڕۆژی ٢٩ی گەلاوێژی ١٤٠٥ی هەتاوی، هێزەکانی ئیتلاعاتی سوپای پاسداران بەبێ بوونی هیچ فەرمانێکی دادوەری و مۆڵەتی یاسایی، هەڵیانکوتاوەتە سەر ماڵی ناوبراو و پاش پشکنینی شوێنەکە و دەستبەسەرداگرتنی ژمارەیەک لە کەرەستە تایبەتییەکانی، هادی ڕەبووسەیان دەستبەسەر کردووە.

تا کاتی ئامادەکردنی ئەم هەواڵە، هیچ زانیارییەک سەبارەت بە هۆکاری دەستبەسەرکردن، جۆری تۆمەتەکان و تەنانەت شوێنی ڕاگرتنی ئەم هاووڵاتییە لە بەردەستدا نییە. هەوڵ و بەدواداچوونەکانی بنەماڵەکەی بۆ ئاگاداربوون لە دۆخی ناوبراو و هۆکاری گرتنەکەی، تا ئێستا هیچ ئاکامێکی نەبووە و بەرپرسانی ئەمنی وەڵامی داواکارییەکانیان نادەنەوە.

دەستبەسەرکردنی ئەم ژینگەپارێزە لە کاتێکدایە کە لە ماوەی ڕابردوودا گوشارەکان بۆ سەر چالاکوانانی مەدەنی و ژینگەپارێزانی کورد لە ناوچە جیاجیاکانی ڕۆژهەڵاتی کوردستان لە لایەن دامەزراوە ئەمنییەکانەوە بە شێوەیەکی بەرچاو پەرەی سەندووە.