ئێعڵام دەسوەکارکردن جەم هاوکاری زاگرۆس.

مەردم ئازاد و شەریف زاگروس،
نەتەوەی کورد،
و ڕای گشتی
 
ڤە دۆخ ک جوغرافیا سیاسی ئێران ڤەگەرد یەکێ ئەژ قۊڵترین و فرە چینترین قەیرانەل سیاسی، کوومەڵایەتی و ئنسانی مێژوو هامچەرخ وژێ ڕۊەڕۊە، و ڤە ساتێ ک ساختار دەسەڵاتدار ستمکار ڤەگەرد چڕکردن سەرکوت، توندوتیژیی سازمان‌دریا، دوچەمەکی سیستماتیک و حاشاکردن مافەل بنەڕەتی نەتەوەل و هام‌ڤڵاتیەل، شەرعیەت سیاسی ئەڕا وژ نەیشتێیە. واقیعەت ئیمڕوو ئێران فرەتر ئەژ جاران دیاریکەر بن‌بەست مێژوویی سیستەم ئقتدارگرایە.
 
ڤە هەمزەمان ڤەگەرد ئێ دوخە ئۆپۆزسیۆن ڤە دەرەوەێ ڤڵاتیش تۊش پارچەپارچەبین، بێ‌پلانی ستراتیژی، لاوازی ڤە شناسین واقیعەت مەیدانی و ناتوانی پێشکەشکردنی جانیشن یەکگرتێ و دموکراتیک ئەڕا بانان جو‌غرافیای سیاسی ئێرانە. جیا ڤە ئەڤەیش، گرایشەل ستەمکارخواز پادشایی دووست ڤەگەرد دوارەکردن هەر ئە مەرکەزگرایی، حاشاکردن ماف نەتەوەل و ڤەرچەم نەگرتن ئەساس بەرابەری سیاسی، نەتەنیا یارمەتی جمشت ئازادی خوازانە نمەکەن، بەڵکو ڤەگەرد مسادرە داواکاریەل مەردمی، بەربەست قورسێ ئەڕا پاگرتن ئەڵتەرناتیڤێک دیموکرات، فدراڵ و ڤەسەر بنەماەل ماف گەلان دورسە مەکەن.
ڤە داخڵیش، هەرچەندە نەتەوەی کورد و حزبەل سیاسی کوردستان هەمیشە ئەژ پێشگامەل خەبات ئەڕا ئازادی و دموکراسی و دادپەروەری بینە، گووای واقیعەتەکە ئەڤەسە ک لاوازی ڤە دروستکردن یەکڵەێ سیاسی یەکگرتێ ڤە ڕووژهەڵات کوردستان، کاریگەری ڤەسەر دەرفەتەل سیاسی هیشتێیە. ئێ مەسعەڵە، ئیمڕوو  فرەتر ئەژ هەر ڤەختێ، نەتەوەی کورد ڤە بەرانبەر ئازموون جدییە مەیلێ ئەڕا سازمان‌گرتن ڤە نام جوغرافیای سیاسی ئێران.
 
ڤە بوونە یە، ئیمە باوەڕمان یەسە ک کورد نەتەوەیە، و ڕووژهەڵات کوردستانیش بەش جیایی هەڵنەگر ئەژ خاک مێژوویی کوردستانە؛ خاکێ ک ناسنامە، زوان، فەرهەنگ، مێژوو و ماف سیاسی دیاری درێ ک نمەتۊنێ ڤە چوارچێوە دیدگا مەرکەزگرایی و دەوڵەت-سەنتەری ئێران  ڤە پەراوێز بکەوێ. پرس کورد پرسێ نەتەوەیی و سیاسییە، نەک تەنیا پرسێک فەرهەنگی یان ماف کەمینەل.
 
هەر ڤە توڕ ئێ زەروورەت مێژووییە، ڤە ئامانج یەکاهایشتن هێزەل سیاسی، مەدەنی، فەرهەنگی و کوومەڵایەتی ناوچەل زاگروس ئەڕا سازین یەکڵەێ سیاسی کوردستان-ئێران ڤەسەر بنەماەل دموکراسی و ماف مرۆڤ و ماف دیاری کردن چارە‌نۊس؛ ئیمە بڕیار دایمن بوون “جەم هامکاری زاگروس” ڤڵاوا بکەیمن. مەکۆێ ک کە بتۊنێ سەکۆێ  بوو ئەڕا ڤەیەک نزیکبین، دیالۆگ، هەماهەنگی پراکتیکی، و ڕێهایشتن بەرپرسیارانە ڤە باشوور ڕۆژهەڵات کوردستان.
ئێ  کردارە دەرئەنجام نیاز عەقڵانی و مێژوویی و نەتەوەییە؛ زەرورەتێ ک ئەژ ناتوانایی ساختارەل حازر ئەڕا جواوداین ڤە داخوازیەل گەل کورد و قەیران ژۆپۆلیتیک بەربڵاو ڤە ئێران سەرچەمە مەگرێ.
 
جەم هامکاری زاگروس ڤەسەر بنەما یەک نیاز مێژوویی و کوومەڵایەتی پاگرتێیە:
زەرورەت یەکاگرتن هێزەل سیاسی، مەدەنی، فەرهەنگی و کوومەڵایەتی باشوور ڕۆژهەڵات کوردستان ڤە ئامانج دورستکردن بەستەر بەردەوام ئەڕا دیالۆگ، هەماهەنگی، کردەوەێ دەستەجەمعی و پاراستن ماف ئنسانی و نەتەوەیی گەل کورد ڤە جوغرافیا سیاسی ئێران.
 
ئەێ جەمە:
_دامەزراوەیکە سەرڤەخو و ناحکومەتی و غەێر ئنتفاعی
_پەێڤەندی ڤە هۊچ حزب و حکومەت و دەسەڵاتێ خارجی نەێرێ
_پابەندە ڤە بنەماەل دموکراسی، مافی مرۆڤ، یەکسانی جنسیەتی، سکولاریسم، فرەچەشنی فەرهەنگی و ڕەتکردن هەر جوورە ستەمکاری - ئایینی بوو یان شاهانە-
_گەل کورد چۊ گەل خاوەن ماف چارەنۊسە مەشناسێ.
وژێ پابەندە مەزانێ ڤە بەشداری و شەفافیەت و جواوگوویی و سەرکردایەتی ڤەکوومەڵ.
 
جەماوەر  یەک حزب سیاسی یان ئاڵترناتیو ڤە بەرانبەر حزبەل کورد نییە.
فام ئیمە ئەڤەسە ک بێ ڕێ هایشتن سیاسی سەرڤەخو و هۆشیارانە گەل کورد، هۊچ گوڕانکاری دموکراتیکێ ڤە جوغرافیا سیاسی ئێران بەردەوام نمەمینێ، و بێ هامپشتی زاگروس، یەکڵەێ سیاسی یەکگرتێ ئەڕا کوردستان ئێران مومکن نماو.
 
ڕاگەیاندن بوون جەم هامکاری زاگروس هامکاتە ڤەگەرد ڕاگەیاندن ناڕەزایەتی خەڵک ئازادیخواز دژ ڤە ڕێژیم دیکتاتۆری کومار ئسڵامی ئێران، کە ڤەداخا ژمارە فرەێ ئەژ هامنیشتمانیەل ئێمە یان گیانی وژێان ڤەدەست دانە یان زامدار بینە و یان ئەژ لایەن رژیم تۆتالیتار دەستبەسەر کریانە
 
جەم هامکاری زاگروس خەم و  هام ژانی وژێ ڤەگەرد مەردم ناڕازی کوردستان ئعڵامە مەکەێ؛ مەردمێ ک ڤەگەرد رشادەت و هەزینە فرە داوا ئازادی و کەرامەت ئنسانی و دادپەروەری کوومەڵایەتی و بانان دموکراتیک کردنە.
 
ئیمە ڕێز ئەژ  یاد ئە کەسەلە مەگریمن ک ڤە ناڕەزایەتیەل مەردمی ڤە ناوچەل زاگروس و ڤە تایبەت کرماشان، ئیلام و لوڕستان گیانیان ڤەدەستدا و هامخەم بنەماڵەل داخدارێانیمن و نارەزایەتیەل مەدەنی و ئاشتیخوازنە مەردم ڤە حەقە مەزانیمن.
دەس ئاخر چالاکوانەل ناوچەل زاگروس ک خەم کار دەستەجەمعی و گام هێزداین ڤەرەو ئامانجەل جەم هامکاری زاگروس درن، دەنگە مەکەیمن ک ڤە ڕێگای ئیمەیڵ
 [email protected]
 ڤەگەردمان پەێڤەند داشتۊن.