هێزە ئەمنییەکانی ئێران هاووڵاتییەکی خەڵکی شاری بانەیان دەستبەسەر کرد.

ڕۆژی سێشەممە، ١٢ی خەزەڵوەر، هێزە ئەمنییەکان بەبێ هەبوونی هیچ بڕیار یان بەڵگەیەکی دادوەری، هەڵیانکوتاوەتە سەر ماڵی هاووڵاتییەک بە ناوی «کاوە عوسمانی»، تەمەن ٥٦ ساڵ، و پاش دەستبەسەرکردنی،

ناوبراویان بۆ لێپرسینەوە ڕەوانەی دەستبەسەرگەی ئیدارەی ئیتلاعات لە شاری سنە کردووە. سەبارەت بە هۆکاری دەستبەسەرکردن و ئەو تۆمەتانەی ئاڕاستەی ناوبراو کراون، تا کاتی ئامادەکردنی ئەم هەواڵە هیچ زانیارییەکی ورد لە بەردەستدا نییە و چارەنووسی ناوبراویش نادیارە.

شایانی باسە، گوشار و دەستبەسەرکردنی هاووڵاتییان لە ناوچە کوردنشینەکان لەلایەن دامەزراوە ئەمنییەکانەوە بەبێ ڕەچاوکردنی ڕێکارە یاساییەکان، دیاردەیەکی بەردەوامە و بنەماڵەی دەستبەسەرکراوان بەهۆی کەمتەرخەمیی بەرپرسان لە پێدانی زانیاری، لە دڵەڕاوکێیەکی بەردەوامدا دەژین.