پارتی لیبراڵ دێموکراتی کوردستان کوردستان ئیدانەی هێرشەکانی حکومەتی سوریا بۆ سەر ڕۆژاوا دەکەین.

ئێمە وەک پارتی لیبراڵ دێموکراتی کوردستان بە توندترین و شیوە  هێرشی سەربازی حکومەتی  کاتی سوریا بۆ سەر ڕۆژئاوای کوردستان شەرمەزار دەکەین؛

ئەم داگیرکارییە خوێناوی و جینایەتە کە لەژێر ناونیشانی حکومەتی ئینتقالی سوریا و لەژێر فەرمانی ڕاستەوخۆی سەرکردە دەسەڵاتدارەکانی ئێستای دیمەشق دەستی پێکرد، جگە لە درێژەی پڕۆژەی سەرکوتکردن و نەهێشتن و نکۆڵیکردن لە ئیرادەی گەلی کورد  هیچی تر نییە.

میللەتێک کە بە خوێنی خۆی و قوربانیدانی هەزاران شەهید ئەهریمەنەکەی داعشی تیک شکاند،میللەتێک کە کۆبانی و شنگال و ڕەقە و دێرەزۆر و موسڵی لە چنگی تیرۆریزمی  ڕزگار کرد؛ میللەتێک کە بە گیانی لاوان و گەنجانی نەتەوەکەی  باجی ئاسایشی جیهانی دا، ئەمڕۆ ئامانجی دەستدرێژی و داگیرکاری و پلانی سرینەوەو سزای سیاسییە. ئەم هێرشە "ڕێوشوێنی ئەمنی" نییە، بەڵکو، داگیرکارییەکی ڕوون و کوشتنی سیاسی و جینۆسایدی کولتوورییە؛ سزای ئەو میللەتەی داعشی تێکشکاند، لەلایەن ڕزگاربووانی هەمان لۆژیک و هەمان توندوتیژی. هەر تاک و بزووتنەوە و دەوڵەتێک کە پشتیوانی ئەم هێرشە بکات یان لە بەرامبەریدا بێدەنگ بێت، لە ڕووی سیاسی و ئەخلاقییەوە هاوبەشە لە بەرهەمهێنانەوەی داعش نوێ.

حکومەتی ئێستای سوریاش هاوشێوەی داعشی دوێنێ بە فەرمی هەموو شەرعیەتێکی لەدەستداوە بەم هێرشانە و بووەتە هێزێکی داگیرکەر و تیرۆریستی لەبەرچاوی گەلی کورد. هەر ڕێککەوتنێک لەژێر فشاری ئەم خوێنڕشتن و دەستدرێژییە واژۆ بکرێت، ڕێککەوتنێکی زۆرەملێیە، پووچەڵ و خاڵییە لە هیچ بەهایەکی یاسایی و سیاسی.ئەم داگیرکارییە پڕۆژەیەکی ڕوونە بۆ پاکتاوکردنی  گەلی کورد.

داوا لە هەموو هێز و دەزگا و ویژدانی بەئاگابوو و وشیار دەکەین کە، بە تەواوەتی و بێ مەرج پشتیوانی بەرخۆدانی ڕۆژاڤا بکەن، لە هەموو ئاستێکی سیاسی و میدیایی و مرۆیی و ماددیدا.

بێدەنگی و سازان لە بەرامبەر ئەم خوێنڕشتنە، خیانەت.

ئەوەی داعش شکست بهێنێت هەرگیز نابێتە قوربانی داعشی نوێ.

ئەوەی بە خوێن بنیات نراوە، تەنها بە خوێن و بەرگری بێ سنوور پارێزراوە.

پارتی لیبراڵ دێموکراتی کوردستان
٣٠ بەفرانباری ٢٧٢٥ کوردی