کۆمەڵێک کەسایەتی لە بانگەوازێکدا کە ئاراستەی هێز و لایەنە سیاسیەکانی رۆژهەڵاتی کوردستانیان کردوە چەند خاڵێکیان بۆ یەکڕێز و یەکگرتووی خستووەتە ڕوو،ئەمش دەقی بانگەوازەکەیە.
بانگەوازێکی بە پەلە
وە نەخشە ڕێگایەکی مێژویی بۆ لایەنە کوردییەکانی ڕۆژهەڵاتی کوردستان !
نیشتمان لە بەردەم وەرچەرخانێکی گەورەدایە؛ یان پێکەوە دەبینە قەوارە، یان بە جیا دەبینە مێژوو!
هەڤاڵان، کوردستانیانی خۆشەویست، ئەمڕۆ ڕۆژهەڵاتی کوردستان و ئێران، لە بەردەم تاقیکردنەوەیەکدایە کە مێژوو تەنها یەکجار دەرفەتی بۆ دەڕەخسێنێت، ئەم ڕوداوانە لە کاتێکدایە کە نەخشەی ڕۆژهەڵاتی ناوەڕاست و ناوچەکە لەژێر داڕشتنەوە و تەمومژێکی چڕدایە، بۆیە کاتی ئەوە هاتووە پارتە کوردییەکان لە خەونی ئایدۆلۆژییەوە خەبەریان بێتەوە و ڕوو لە "واقیعی سیاسی" بکەن، ئەمەی خوارەوە بانگەوازێکی بەپەلە و نەخشە ڕێگایەکی پێنج قۆناغیی ئێمەی توێژەرانی تێکەڵ بە ناوەندە نێودەوڵەتیەکانە، بۆ تێپەڕین لەم قۆناغە مەترسیدارە:
بەشی یەکەم: پێنج هەنگاوی چارەنوسساز بۆ مانەوە؟
١. تێپەڕاندنی ئایدۆلۆژیای"کۆمۆنیزم" و گەڕانەوە بۆ "نەتەوە"،
ئەمە تەنها پێشنیار نییە بۆ سەرجەم پارتە چەپەکانی ڕۆژهەڵاتمان، بەڵکو مەرجی مانەوەیە، ئایدۆلۆژیای چەپ و مارکسیستی لە ئاستی جیهانیدا شکستی هێناوە و پاشکۆیەتی بۆ ئەم فکرەیە، کورد لە هاوکێشە جیهانییەکان دەکاتە دەرەوە، ئەمریکا و ئیسرائیل وەک داڕێژەرانی نەخشەی نوێ، ئامادە نین پشتگیری لە بزوتنەوەیەک بکەن کە "بۆنی مۆسکۆ"ی لێ بێت، ناوی "کۆمەڵە" یان "زەحمەتکێش" یا هەر دروشمێکی توندڕەوی چەپ، لە مێشکی سیاسیی ڕۆژئاوادا یەکسانە بە دژایەتی سەرمایەداری و نزیکی لە بلۆکی ڕوسیا و چین، کاتی ئەوەیە وەک چۆن پەکەکە هەوڵی گۆڕانکاری دا، ئێوەش بۆ پاراستنی مێژوی پڕ لە قوربانیتان، ناوی حیزبەکان و دروشمەکانتان نوێ بکەنەوە، تکایە ئەمە ئازایەتییە نەک پاشەکشە.
٢. ڕاگەیاندنی "کۆمسیۆنی هاوبەشی دیپلۆماسی" بۆ سەرجەم پارتە کوردیەکان لە ژێر چەترێکدا؟
نابێت هەر حیزبە و بە جیا لە دەرگای وڵاتان بدات، دەبێت دەستبەجێ کۆنگرەیەکی خێرای پارتە کوردیەکانی ڕۆژهەڵات ئەنجام بدرێت و وەفدێکی یەکگرتووی نەتەوەیی (بەبێ دروشمی حیزبی) پێکبێت، جیهان تەنها گوێ لەو دەنگە دەگرێت کە یەک گوتار و یەک پڕۆژەی پێیە.
٣. واژۆکردنی "پەیمانی برایەتی" و قەدەغەکردنی خوێن ڕشتن.؟
پێش هەر گۆڕانکارییەک، دەبێت هەموان پەیماننامەیەکی شەرەف واژۆ بکرێت: "خوێنی کورد لەسەر دەستی کورد حەرامە"، ئەمە تاکە گرەنتییە بۆ ڕێگریکردن لە تەداخولی وڵاتانی دوژمن و ڕێگرتن لە "براکوژی" لە کاتی بۆشایی دەسەڵاتدا.
٤. دروستکردنی ژوری عەمەلیاتی هاوبەشی پێشمەرگە؟
هێزی پێشمەرگە دەبێت لەژێر یەک فەرماندەیی نیشتمانیدا ڕێکبخرێتەوە، ئەرکی ئەم هێزە تەنها شەڕ نییە، بەڵکو پاراستنی ژێرخانی وڵات (ئاو، کارەبا، بنکە ستراتیژییەکان) و دابینکردنی ئارامییە بۆ ئەوەی خەڵک نەکەونە ناو دڵەڕاوکێی بژێوی دوای ڕوخانی ڕژێم.
٥. ستراتیژی "دوای ڕووخان": کار کردن بۆ دەوڵەت وەکو پلانی ئەی، وە فیدراڵیزم وەکو پلانی بی، لە ڕێی ئامادەکردنی پڕۆژەی "دەوڵەتی کوردستانی گەورە" وەک مافێکی ڕەوا، و هاوتەریب داڕشتنی پڕۆژەی "فیدراڵیزم" وەک پلانی (B) لە ناو دەستورێکی دیموکراتدا، هەروەها پێکهێنانی دادگای بێلایەن و پەیڕەوکردنی سیاسەتی "لێخۆشبوونی نیشتمانی" بۆ ئەو کوردانەی لەناو دامودەزگاکانی ڕژێمدان، تاوەکو نەبنەوە بە پاشکۆی حکومەتی داهاتوی تاران دژی گەلەکەیان.
بەشی دووەم: داوا لە سەرجەم پارتە کوردیەکان دەکەین هەستن بە ڕاگەیاندنی بەیاننامەیەکی بە پەلە خێرا وەکو
بەیاننامەی هێزە دیموکراتەکان بۆ ڕای گشتی جیهانی و هەرێمی لە ژێر ناوی:
"بەرەو گواستنەوەیەکی دیموکراتی و سەقامگیر لە ئێراندا"
ئێمە وەک هێزە سیاسییەکانی ڕۆژهەڵاتی کوردستان، کە ئەم خاڵانەی لای خوارە لە خۆ بگرێت:
ئێمە وەکو هێزە دیموکراتی و نەتەوەییەکانی ڕۆژهەڵاتی کوردستان و خۆرئاوای ئێران بە ڕای گشتی جیهانی ڕا دەکەین کە تەنها سەرچاوەی دەسەڵات لە کوردستانی داهاتوودا، دەنگی ئازادانەی خەڵک و سندوقەکانی دەنگدانە، پاراستنی مافی هەموو پێکهاتە ئایینی و نەتەوەییەکان (ئازەری، ئەرمەنی، جولەکە، بەهایی، یارسانی، سوننی و شیعە) ئەولەویەتی ئێمەیە.
کوردستان دەبێتە سەنگەری بەرگری دژی تیرۆر و توندڕەوی ئایینی، پێشمەرگە دەبێتە پاسەوانی ئاسایشی ناوچەکە و هیچ هەڕەشەیەک بۆ سەر دراوسێکان دروست ناکات.
داوا لە ئەمریکا و ئەوروپا دەکەین "ئەنجومەنی باڵای نیشتمانیی کوردستان" وەک نوێنەری شەرعی بناسن و چەتری پاراستنی نێودەوڵەتی بۆ ڕێگری لە کۆمەڵکوژی دابین بکەن.
ئێمەی کورد دەستی هاوکاری بۆ ئەو هێزە ئێرانییانە درێژ دەکەین کە بڕوایان بە "ئێرانێکی فیدراڵ" هەیە، دەبێت هەموان بزانن ئازادیی لە تلران تاران بەبێ ئازادیی کوردستان مەحاڵە.
.jpg)
.webp)
.jpg)
.webp)
