لە سێدارەدانی دوو بەندکراوی سیاسیی کورد.

بەرەبەیانی ئەمڕۆ دووشەممە، ١١ی جۆزەردان، سزای لە سێدارەدانی ئەشکەن مالیکی و مێهرداد محەممەدی‌نیا بە شێوەیەکی نهێنی و بەبێ مافی چاوپێکەوتنی کۆتایی لەگەڵ بنەماڵەکانیان جێبەجێ کرا. هەروەها مەترسیی لە سێدارەدانی هاودۆسیەیەکی دیکەیان بە ناوی «ئارمان مەعریفەتی»، هاووڵاتیی کورد و خەڵکی سەقز، هێشتا لە ئارادایە. ئاژانسی هەواڵی «میزان»، سەر بە دەزگای دادوەریی کۆماری ئیسلامی، لە سێدارەدانی ئەم دوو هاووڵاتییە کوردەی پشتڕاست کردەوە. ئەشکەن مالیکی و مێهرداد محەممەدی‌نیا پێشتر لە دۆسیەیەکی هاوبەشدا لەگەڵ هاووڵاتییەکی دیکەی کورد بە ناوی ئارمان مەعریفەتی (تەمەن ٣٨ ساڵ و خەڵکی سەقز)، لەلایەن لقی ١٥ی دادگای شۆڕشی تارانەوە بە سەرۆکایەتیی دادوەر ئەبولقاسم سەڵەواتی، بە تۆمەتی «محاربە» سزای لە سێدارەدانیان بۆ دەرچووبوو. دەزگای دادوەریی کۆماری ئیسلامی ئەم ناڕازییانەی بە تێکدان و ئاگرتێبەردانی «مزگەوتی جەعفەری» و «حەوزەی زانستیی ئیمام هادی» لە گەڕەکی «نەسڕ» (گیشا)ی تاران و تێکدانی موڵکی گشتی لە کاتی خۆپیشاندانەکانی مانگی بەفرانباردا تۆمەتبار کردبوو. شایانی باسە، ئەو دوو زیندانییە لە ماوەی دەستبەسەرکرانیاندا لە مافی دەستگەیشتن بە پارێزەر بێبەش کرابوون و ئەو سزا قورس و دژە مرۆڤانەیەش لەژێر توندترین فشاری دەزگا ئەمنییەکان و لەسەر بنەمای «دانپێدانانی زۆرەملێ و ئەشکەنجە» بەسەریاندا سەپابوو.