چارەنووسی هاووڵاتییەکی خەڵکی کرماشان دوای دە ڕۆژ لە دەستبەسەرکردنی نادیارە.

هەواڵدەریی مافی مرۆڤی «هێرانا» لە ڕاپۆرتێکدا ئاشکرای کردووە کە ناوبراو ڕۆژی شەممە، ٢٠ی پووشپەڕ، لە شوێنی کارەکەی خۆیدا لە شاری کرماشان، لەلایەن هێزە ئەمنییەکانەوە دەستبەسەر کراوە. بەگوێرەی زانیارییەکان، پرۆسەی دەستبەسەرکردنی ئەو هاووڵاتییە بەبێ هیچ پاساوێکی یاسایی و پێشکەشکردنی بەڵگەی دادوەری ئەنجام دراوە.

نادیاربوونی چارەنووسی ئارش مەحموودی، بووەتە هۆی دروستبوونی نیگەرانییەکی قووڵ لای بنەماڵەکەی. سەرەڕای تێپەڕبوونی ئەو ماوە زۆرە، تا کاتی ئامادەکردنی ئەم هەواڵە، هیچ زانیارییەک لەبارەی هۆکاری گرتن، ئەو تۆمەتانەی خراونەتە پاڵی و هەروەها شوێنی ڕاگرتنی لەبەردەستدا نییە. دەستبەسەرکردنی هاووڵاتییان بەبێ ڕەچاوکردنی بنەما یاساییەکان و ڕێگریکردن لە پەیوەندییان لەگەڵ بنەماڵەکانیان، یەکێکە لەو ڕەوشە باوانەی کە لە ساڵانی ڕابردوودا نیگەرانیی ڕێکخراوە نێودەوڵەتییەکانی مافی مرۆڤی لێ کەوتووەتەوە.