سەپاندنی سزای نوێی وەزارەتی گەنجینەی ئەمریکا بەسەر ئێراندا.

ئەمڕۆ هەینی، ٦ی خەرمانان، سکۆت بێسێنت، وەزیری گەنجینەی ئەمریکا لە ڕاگەیەندراوێکدا ئاشکرای کرد، وەزارەتەکەی بەڵێنی دابوو تەواوی ئەو شادەمارە ئابوورییانەی بۆ تاران ماونەتەوە، بپچڕێنێت و کۆتایی بە هەڕەشەکانی ئێران بهێنێت. ناوبراو گوتی: «ئێمە پێشتریش هۆشداریمان دابوو کە ئەو لایەنانەی هاوکاری و ئاسانکاری بۆ ئێران دەکەن، ناتوانن بەردەوام بن لە دەستڕاگەیشتن بە دۆلاری ئەمریکی و سوودوەرگرتن لە سیستەمی دارایی جیهانی؛ لقی بانکی میسر لە ئیمارات بڕیاریدا ڕێگە سەختەکە تاقیبکاتەوە، هەر بۆیە ئەمڕۆ یەکەمین هەنگاو بۆ لێپرسینەوە لێی لە بەرامبەر ئەو پشتیوانییە بەردەوام و مەترسیدارەی پێشکەشی ئێرانی دەکات، دەست پێ دەکەین.»

بەپێی ڕاپۆرتی «تۆڕی جێبەجێکردنی تاوانە داراییەکانی ئەمریکا» (FinCEN)، لقی بانکی میسر لە ئیمارات (Banque Misr UAE) وەک ناوەندێکی سەرەکی و مەترسیداری دەستڕاگەیشتنی تاران بە دۆلاری ئەمریکی پۆلێن کراوە. تاران ئەم جۆرە تۆڕانە بۆ سپیکردنەوەی پارە، کڕینی چەک و دابینکردنی بودجە بۆ گرووپە چەکدار و تیرۆریستییە هاوپەیمانەکانی لە ناوچەکەدا بەکار دەهێنێت. هاوکات لە نێو کڕیارەکانی ئەو بانکەدا، کۆمپانیای ساختەی سەر بە «وەزارەتی جەنگی» ئێران، سوپای پاسداران و کەسایەتییە نزیکەکان لە موجتەبا خامنەیی، ڕێبەری باڵای ئێران، بوونیان هەیە.

هاوکات لەگەڵ ئەم ڕێکارەدا، «نووسینگەی کۆنترۆڵکردنی سەروەت و سامانی بیانی» (OFAC) زنجیرەیەک سزای نوێی لە چوارچێوەی یاساکانی دژەتیرۆردا سەپاند. لەو چوارچێوەیەدا، سزای بەسەر ڕەزا محەممەد تائیدی، هاووڵاتیی ئێرانی و بەڕێوەبەری گشتیی لقی دوبەی بانکی میللیی ئێراندا سەپاند، بە تۆمەتی ئەوەی لە ڕێگەی ئەو بانکەوە ئاسانکاریی بۆ مامەڵەی ملیاران دۆلار لە ڕێگەی هەژمارەکانی «فەیلەقی قودس»ی سوپای پاسداران کردووە و پارەی بۆ میلیشیاکانی سەر بە تاران لە عێراق و ناوچەکە دابین کردووە.

هەروەها کۆمپانیای بازرگانیی (Kameng Trading Limited) لە هۆنگ کۆنگ خرایە لیستی سزاکانەوە، بەهۆی سپیکردنەوەی پارە بۆ کۆمپانیای ئاڵوگۆڕی دراوی سزادراوی ئێرانی، ناسراو بە «پێدرام پیرووزان/ ئۆپال ئێکسچەینج». وەزارەتی گەنجینەی ئەمریکا ڕوونی کردەوە، «ئۆپەراسیۆنی پەراوێزخستنی ئابووری» کە لە لایەن بێسێنتەوە ڕاگەیەندرا، نەخشەی سەرجەم کەناڵە داراییەکان، قاچاخچێتیی نەوت و تۆڕەکانی تێپەڕاندنی سزاکانی تارانی بە مەبەستی وشککردنی تەواوەتیی داهاتە نایاساییەکانی ئێران دیاری کردووە. گەنجینەی ئەمریکا هۆشداریی داوە هەر دامەزراوەیەکی دارایی لە جیهاندا مامەڵە لەگەڵ ئەم لایەنانە بکات، ڕووبەڕووی سزای لاوەکی و دابڕانی یەکجارەکی لە سیستەمی دارایی ئەمریکا دەبێتەوە.

لە بەشێکی دیکەی ڕاگەیەندراوەکەدا هاتووە کە سەرجەم سامانی ئەو لایەن و کەسانە لە خاکی ئەمریکا یان لەژێر دەسەڵاتی هاووڵاتییانی ئەمریکادا بلۆک دەکرێن، و هەر جۆرە پێشکەشکردنی خزمەتگوزارییەک پێیان، بە توندی سزا دەدرێت.