تیرۆرکردنی دکتۆر عەبدولڕەحمان قاسملوو"برینێکی سارێژنەبووی مێژووی کورد".

لە ٢٢ی پووشپەڕی ١٣٦٨ی هەتاوی (١٣ی تەممووزی ١٩٨٩)، دکتۆر قاسملوو و دوو هاوڕێی بە ناوەکانی عەبدوڵڵا قادری ئازەر و فازڵ ڕەسوول، لە کاتێکدا لە شاری ڤیەنای پایتەختی نەمسا سەرقاڵی دانیشتن و دانوستان بوون بۆ دۆزینەوەی چارەسەرێکی ئاشتییانە بۆ پرسی نەتەوەییی کورد، کەوتنە بەر شاڵاوی تیرۆریستیی نوێنەرانی کۆماری ئیسلامیی ئێران و گیانیان بەخت کرد.

دکتۆر قاسملوو وەک سیاسەتمەدارێکی زیرەک و بیرمەندێکی قوڵ، هەمیشە بڕوای بە وتووێژ و ئاشتی بوو. ناوبراو لە زۆربەی وێستگەکانی ژیانی سیاسییدا جەختی لەسەر ڕێگاچارەی مەدەنی و گفتوگۆ دەکردەوە، بەڵام تیرۆرکردنی ئەو لەسەر مێزی دانوستان، نیشانەی ئەوە بوو کە دەسەڵاتی تاران تەنیا بە زمانی کوشتن و توندوتیژی لەگەڵ ویستی ئازادیخوازیی گەلی کورد مامەڵە دەکات.

ئەم کارەساتە مرۆییە، یەکێکە لە دیارترین نموونەکانی سیاسەتی تیرۆر لە دەرەوەی سنوورەکان کە لەلایەن کۆماری ئیسلامییەوە پەیڕەو دەکرێت. سەرەڕای تێپەڕینی دەیان ساڵ بەسەر ئەم ڕووداوەدا، تا ئێستاش دادپەروەرییەکی تەواو بەدی نەهاتووە و ئەم کەیسە بەهۆی بێدەنگیی بەشێک لە وڵاتانی ڕۆژئاوا و سیاسەتە بەرژەوەندیخوازەکان، وەک برینێکی کراوە لە مێژووی خەباتی کورددا ماوەتەوە.

یادی دکتۆر قاسملوو و هاوڕێ شەهیدەکانی، وەک هێمای ئاشتیخوازی و قوربانیدان لە پێناوی مافە ڕەواکانی گەل، هەمیشە لە مێژووی تێکۆشانی کورددا بە زیندوویی دەمێنێتەوە و  ڕێز لە خەبات و ماندووبوونی ئەو پێشەنگانە دەبێ بگرین کە گیانی خۆیان کردە قوربانیی ڕێگای ئازادی و دیموکراسی.