یەکێتیی ئەورووپا سزای نوێ بەسەر بەرپرسانی ئێراندا دەسەپێنێت.

بڕیارە ئەمڕۆ پێنجشەممە، لە کۆبوونەوەی ئەنجومەنی وەزیرانی دەرەوەی یەکێتیی ئەورووپا لە برۆکسل، سزاکان بە فەرمی پەسەند بکرێن. سزاکان ئەو کەس و لایەنانە دەکاتە ئامانج، کە دەستیان لە سەرکوتکردنی خۆپیشاندانەکان و پێشێلکردنی مافەکانی مرۆڤدا هەبووە.
بە گوێرەی زانیارییەکان، سزاکانی یەکێتیی ئەوروپا چەند بوارێک دەگرێتەوە: ئەو کەسانەی سزا دەدرێن، ڕێگەیان پێنادرێت سەردانی وڵاتانی ئەندامی یەکێتیی ئەورووپا بکەن، تەواوی سامان و سەرمایەی ئەو کەس و لایەنانە لە بانکەکانی ئەورووپا بلۆک دەکرێت و چاوەڕوان دەکرێت ڕێکارێکی یاسایی بۆ بلۆککردنی سامانی ٢١ کەس و دامەزراوە لە ئێران پەسەند بکرێت، کە ئەندامانی باڵای سوپای پاسدارانیشی تێدایە.
لەم پێوەندییەدا، وەزیری دەرەوەی فەڕەنسا دووپاتی کردەوە، پێویستە ئێران بە زووترین کات ئەم هەنگاوانە بنێت، ئازادکردنی سەرجەم زیندانیانی سیاسی و خۆپیشاندەران، کۆتاییهێنان بە سزای لەسێدارەدان و گەڕاندنەوەی خزمەتگوزارییەکانی ئینتەرنێت و پەیوەندییەکان بۆ هاووڵاتییان.