کۆڵبەرێکی کورد لە سنووری نەوسوود بە تەقەی ڕاستەوخۆی هێزەکانی ئێران کوژرا.

بەپێی زانیارییەکان، ناوبراو لە مەودایەکی زۆر نزیکەوە کراوەتە ئامانجی گولـلەی ئەو هێزانە و دەستبەجێ بەهۆی سەختیی برینەکەیەوە لە شوێنی ڕووداوەکەدا گیانی سپاردووە. وەزیر ڕەحیمی، خەڵکی گوندی «مەنسوورئاغایی»ی سەر بە شارۆچکەی شاهۆی شاری ڕوانسەر بووە و خێزان‌دار بووە. ناوبراو بەهۆی بێکاری و دۆخی خراپی ئابوورییەوە، لە ماوەی بیست ساڵی ڕابردوودا ناچار ببوو لە شاری سنووریی نەوسوود نیشتەجێ ببێت و لە ڕێگەی کۆڵبەرییەوە بژێوی ژیانی خۆی و بنەماڵەکەی دابین بکات. ڕووداوی کوشتنی ئەم کۆڵبەرە لەکاتێکدایە کە لە ماوەی ئەمساڵدا، بەهۆی تەقەی ڕاستەوخۆی هێزە ئەمنییەکانی ئێران لە سنوورەکان، ژمارەیەک کۆڵبەری دیکەش بوونەتە قوربانی و گوشارەکان بۆ سەر ئەو توێژە هەژارە زیاتر بووە.