هاووڵاتییەکی خەڵکی بۆکان لەلایەن هێزە ئەمنییەکانەوە دەستبەسەر کرا.

بەپێی ئەو زانیارییانەی بە دەست گەیشتوون، هێزە ئەمنییەکان بەبێ پیشاندانی هیچ فەرمانێکی دادوەری و بە شێوەیەکی سەرەڕۆیانە هەڵیانکوتاوەتە سەر ئەم هاووڵاتییە و دوای دەستبەسەرکردنی، بۆ شوێنێکی نادیار گواستوویانەتەوە.

سەرچاوەیەکی ئاگادار ڕای گەیاندووە کە هێمن مەنیجە لە کاتی دەستبەسەرکردنییەوە تا ئێستا، لە بنەڕەتیترین مافەکانی خۆی، لەوانە دەستڕاگەیشتن بە پارێزەر، چاوپێکەوتن لەگەڵ بنەماڵەکەی و پەیوەندیی تەلەفۆنی بێبەش کراوە.

تا ساتی ئامادەکردنی ئەم هەواڵە، هیچ زانیارییەکی ورد لەسەر هۆکاری دەستبەسەرکردن، ئەو تۆمەتانەی ئاڕاستەی کراوە و هەروەها شوێنی ڕاگرتنی ناوبراو لەبەردەستدا نییە و نیگەرانییەکانی بنەماڵەکەی لەمەڕ دۆخی تەندروستی و چارەنووسی کوڕەکەیان ڕۆژ بە ڕۆژ زیاتر دەبێت.