دەروازەیەك بەرەو باوەڕەكانی "پارتی لیبراڵ دێمۆکراتی کوردستان"
بە رستەیەكی جوان وسەرنجڕاكێشەوە دەست پێدەكەین.
زانایەك دەڵێ: "با" كاری بە مۆمی كوژاوە نیە. ئەگەر ئازاری تۆ دەدەن و تووشی كێشەت دەكەن تەنیا لەبەر ئەوەیە كە تۆ داگیرساوی و رووناكیت هەیە !
ئەم رستەیە كارتێكەریی لە ناخی هەموو ئەو كەسانەدا دەبێت كە نەیانهێشتوە لەباریان ببەن و هەر بەو رۆحە شۆڕشگێڕی و یاخیەوە ماونەتەوە كە لە بەرانبەر دوژمنانی گەلەكەیاندا هەڵوێستیان هەبێت.
شۆڕش جوانترین پڕۆژەی مرۆڤی شارستانی یە.
ویكتۆر هۆگۆ دەڵێ: من مرۆڤی زیندوو بەوانە دەزانم كە خەبات دەكەن.
بە بێ خەباتكردن، ژیان مەرگە!
شۆڕش جوانترین و سەرنجڕاكێشترین پڕۆژەیەكە كە بایەخە ئینسانییەكان بۆ مرۆڤ دەگێڕێتەوە و داوای ئەوە دەكات بەهای زیاتر بە ئینسان بدرێت.
لە هەمانكاتیشدا دەبێ ئەوە بزانین كە نابێ لەم دەستەواژە مەزنە بۆ پڕكردنەوەی بەرژەوەندییە لەدەستچوە تاكەكەسییەكان كەڵكی لێوەربگیرێت.
شۆڕش كە ئاراستە جوانەكەی خۆی پیشانی مرۆڤدا و مرۆڤ لێی تێگەیشت، ئەوا ئیتر بەردەوام وەك خۆرێك كە تارمایییەكانی رۆحی گەردوون دەسڕێتەوە ئەویش تارماییەكانی رۆحی ئینسان لادەبات و جلوبەرگێكی خاوێن بە بەری مرۆڤی رەشێندراوو بایكۆتكراوو لە تاریكیدا زیندانكراوی رابردوودا دەكاتەوە.
ئەركی شۆڕش لە راستیدا گەڕانەوەی كەرامەت بۆ ئینسانە و كاتێك ئەوەی كرد، بومەلەرزەیەك لە ناخی ئینسانی ئاگادا دروستدەكات. لە دەروونی تاكەكاندا وزەیەكی گەورە ئازاد دەكات و لە ژیانی زنجیركراوی رابردوو دایدەماڵێ و دەیباتە پێشەوە و هەنگاوەكانی خێراتر دەكات.
وەك كورد پێویستە بوومەلەرزەیەك لە دەروونمانا روو بدات. ئەمەش بە خۆمان كەوتووە كە كەی روودەدات!؟!
- یەكێك لەو پرسیارانەی كە پێویستە ئێمە لە خۆمانی بكەین، ئەمەیە:
چۆن دەبێ دەروونمان بارەو بار بكەین و بۆ دەبێ بارەو باری بكەین؟
- ئایا كورد پێویستی بەم بوومەلەرزەیە هەیە یان تەنیا تەجروبە و تاقیكارییەكی دەروونییە؟
- شۆڕشێكی دەروونی پێویستی بە چ كەرەستەیەك هەیە؟
- ئاكامەكانی ئەم شۆڕشە دەروونییە بۆ ئێمەی كورد چی یە؟
- داخۆ ئەم شۆڕشە دەروونییە تا چ ئاستێك كۆمەڵگا بەرەو پێش دەبات؟
لێرەوەیە دەبێ باس لەوە بكەین كە:
- ئێمە پێش لە هەموو شتێك دەمانەوێ خاوەنی كەرامەتی خۆمان بین و ئەمەش بە پێكهێنانی دەوڵەت وەدەستی دێنین.
دەوڵەت وەكو پێست وایە بۆ جەستەی نەتەوەكەمان كە ناهێڵێ، ئەندامەكانی بكەونە بەردەست و پێی نەتەوەكانی دیكە.
دەوڵەت لەژێر دەست و پێی ئەم و ئەو دەرماندێنێ و كۆماندەكاتەوە و كەرامەتی دووبارەمان پێدەبەخشێت و سنوورێك بۆ دەستدرێژییەكانی بێگانە بۆسەر ماڵ و حاڵی كوردان دادەنێ.
- ئێمە نابێ ئیرادەی هیچ گەلێكمان بە رادەی ئیرادەی گەلی كورد بەلاوە بەهێز بێت.
گەلی كورد بە رادەیەك خۆڕاگری كردووە و سەرسەختیی نواندووە، كە هەموو دنیای رۆژهەڵات و رۆژئاوای بەچۆكدا هێناوە بۆ ئەوەی مافە زەوتكراوەكانی پێ بدەنەوە، چونكا كورد تەنیا نەتەوەیەك بووە، هیچ پشتیوانێكی نەبووە و هەموو دنیاش لەسەر سڕینەوەی لەسەر نەخشەی جوغرافیای جیهان كۆك بوون. ئەمەمان لە خوێندنەوەی مێژووی كورددا و لە پەیماننامە نێودەوڵەتییەكانی وەك لۆزان بۆ دەردەكەوێ. بۆیە باوەڕت دەبێ وابێ: هیچ نەتەوەیەك وەك كورد بەهێز نییە.ئەم نەتەوەیە باوەڕ و هێزی تاكەكانی رایگرتووە و تاكی كوردیش بە ئیرادەترین تاكی ناو نەتەوەكانی سەر گۆی زەوییە.
- بۆ سەركەوتن پێویستمان بە مێشكێكی كراوەیە هەیە. زەینی مرۆڤ وەك چەتری رزگاركەری فڕۆكەوان وایە. هەتا نەكرێتەوە، رزگارت ناكات. بۆیە كوردی هەزارەی تازە دەبێ بە زەینی كراوەوە بەرەو ئامانج باڵ لێ بدات.
- پیاوانی گەورە خۆیان دەخەنە مەینەتەوە بۆ ئەوەی خەڵكی هەژاری كۆمەڵگاكەیان ئاسوودە بن. تۆش دەبێ وەك گەورەپیاوێكی خەباتكاری كورد چاو لە خۆت بكەیت. دەبێ خۆت بخەیتە ناو مەینەتەوە بۆ رزگاریی گەلە بەش مەینەتەكەت.
- ئەنجامدانی كاری گەورە زۆر ئەستەمە و ئەمەش بابەتێكە سەلماوە. بەڵام ئێمە تەنیا بۆ ئەنجامی كاری گەورە شۆڕش ناكەین، بەڵكو دەمانەوێ ئەركە ئێجگار قورسەكە وەئەستۆ بگرین كە كۆنترۆڵ و سەرپەرستی و بەڕێوەبەریی كاری ئەستەمە. كەواتە دەبێ هەر لە ئێستاوە خۆمان بۆ بەڕێوەبردنی ئەرك و بەرپرسیارێتیی قورس ئامادە بكەین.
- ئێمە نەتەوەیەكی خۆپارێزین و دوژمنانیشمان دەستدرێژیكار.
ئەمە زۆر گێلانەیە متمانە بە دوژمن بكەین. ئێمە دەبێ هەتا رزگار ئەبین، سێ خاڵی سەرەكی لەبەرنامەی كاری خۆماندا بە بنەما بگرین:
1- هەرگیز بیر لە دۆستایەتیی تورك و فارس و عەرەب مەكەرەوە، مەگەر نیشتمانەكەت رزگار بووبێت و ئەوانیش دانیان بە تاونەكانی رابردوویاندا نابێ كە بەرانبەر بە نەتەوەی كورد كردوویانە و حازر بن قەرەبووی رابردووی پڕ لە تاوانی خۆیان بكەنەوە.
2- دوژمن بە پیلانەوە بۆ لایی ئێمە دێت. ئەم خاڵە نابێ هەرگیز فەرامۆش بكەین. ئێمە هەتا ئێستاش نەتەوەیەكی ساكارین لە سیاسەتكردندا و نابێ چیتر فریوی دوژمنانمان بخۆین. ئەمە زۆر گێلانەیە ئەگەر بە سینگی ئاوەڵا و بێ پەرژینەوە بۆ لای دوژمن بڕۆین، لە كاتێكدا ئەو بۆ كوشتن و لەداو خستنی ئێمە هاتووەو پەیامی داگیركارانەی خۆی وەلانەناوە.
3- دەبێ لەم قۆناغە بەدواوە ئوسلووبی سیاسی و كلتوور و رەوشتی خۆمان لەوان جیابكەینەوە. دەبێ سنوورێك بۆ ئەوان دابنێین لەبەر ئەوەی بە ئاسانی نەتوانن كەرامەتمان پێشێل بكەن.
ئەم خاڵانە سەرەتاكانی باوەڕی ناسیۆنالیستیی كوردن. ئێمەش بۆ ئەوەی ببین بە شوڕشگێڕێكی جێگای متمانەی گەلەكەمان، دەبێ پابەند بە بنەماكانی باوەڕی نەتەوەیی خۆمان بین كە باس لە وەرگرتنەوەی سەروەرییەكانی كورد لە بێگانە دەكەن:
1- خاكی داگیركراو
2- كەرامەت و مافی زەوتكراو
3- زمانی شێوێندراو
4- نەبوونی دەوڵەتی شیاوی ئامانجەكانی خەباتی گەلی كورد بۆ بەرگریكردن لە مافەكانمان
5- پچڕاندنی یەكەكانی پێكهێنەری نەتەوەیەكی مەزنی خاوەن مێژوو، بۆ ئەوەی یەكێتیی نەتەوەیی دروست نەبێت.
6- ناسنامەی گەردوونی و ئاڵا و سروود و نیشتمانێكی سەربەخۆ.
كە واتە بۆ ئەوەی لە ناوخۆماندا پڕەنسیپەكانی هێزەكەمان پێشێل نەكەین و رێز لە هاونیشتمانانی خەباتكاری خۆمان بگرین و ژینگەیەكی خاوێن بۆ خەباتی نەتەوەیی دروست بكەین، پێویستە ئاییننامەمان هەبێت.
لەم ئاییننامەیەدا گوتراوە كە "پێشمەرگەیەكی شۆڕشگێڕی كورد" لەگەڵ چواردەوری خۆیدا چۆن هەڵسوكەوت بكات.
واتە لەپێناوی پاراستنی سیاسەت و قەروارەی یەكێتییەكەماندا پێویستە هێندێك رێوشوێنی ئەخلاقیی شۆڕشگێڕانە بگرینەبەر ، چونكا خۆڕاگریمان لەم چەند ساڵەی رابردوودا بە دۆست و دوژمنی سەلماند كە بڵێین: ئێمە بەردەوام روو لە گەشەین و ناهێڵین، جارێكیتر رۆڵەیەكی شۆڕشگێڕان بەهەتیوی بكەوێتە بەرپەلاماری نەیارەكانمان.
خۆڕاگریمان ئەوەی سەلماند كە بە كۆمەڵانی خەباتكاری كوردستان بڵێین: شۆڕشگێڕی راستەقینە لە زیندان و لە تاراوگە و لە هەژاری و نەداری و بێ دەرەتانییشدا هەر بیری بەلای رزگاریی نەتەوەكەیەتی.
