چارەنووسی هاووڵاتییەکی دەستبەسەرکراو دوای ٩ ڕۆژ هێشتا ناڕوونە.

بەپێی ئەو زانیارییانەی بە دەست گەیشتوون، ئەو هاووڵاتییە کوردە کە ناوی «دانیال محەممەدی» و تەمەنی ٢٧ ساڵە، ڕۆژی سێشەممە ٢٠ی گەلاوێژ، لە لایەن هێزەکانی ئیدارەی ئیتڵاعاتی شاری سنەوە دەستبەسەر کراوە و گوازراوەتەوە بۆ یەکێک لە دەستبەسەرگە ئەمنییەکان.

سەرچاوەیەکی ئاگادار لەم بارەیەوە ڕاگەیاندووە: «لە ماوەی ئەو نۆ ڕۆژەی بەسەر دەستبەسەرکردنی دانیال محەممەدیدا تێپەڕیوە، ناوبراو تەنیا پەیوەندییەکی تەلەفۆنیی کورتی لەگەڵ بنەماڵەکەی هەبووە و تێیدا هەواڵی دەستبەسەرکرانی خۆی پێ ڕاگەیاندوون.»

تا کاتی ئامادەکردنی ئەم هەواڵە، سەرەڕای بەدواداچوونی بەردەوامی بنەماڵەی ناوبراو، هیچ زانیارییەکی فەرمی سەبارەت بە هۆکارەکانی دەستبەسەرکردن، ئەو تۆمەتانەی خراونەتە پاڵی و شوێنی ڕاگرتنی دانیال محەممەدی، بە بنەماڵەکەی نەدراوە.
ناڕوونیی چارەنووسی ئەو هاووڵاتییە نیگەرانیی بنەماڵەکەی سەبارەت بە سەلامەتیی گیانی و دۆخی تەندروستیی ناوبراوی زیاتر کردوو.