سوپاس و پێزانینی خۆمان ئاراستەی سەرجەم حیزب، لایەن و کەسایەتییانە دەکەین.

خەڵكی ئازادیخوازی كوردستان

كۆڕو كۆمەڵە سیاسییە كوردستانی و نێودەوڵەتییەكان

ژنان، لاوان، خوێندكاران، رووناكبیران

سڵاوێکی سۆڕشگێرانە

وێڕای دەربڕینی خۆشحاڵیی قووڵمان، بە ئەرکی سەرشانی خۆمانی دەزانین سپاس و پێزانینی بێپایانی خۆمان ئاراستەی سەرجەم ئەو کەسایەتییە نیشتمانپەروەر، ڕۆشنبیر و دڵسۆزانە بکەین کە بە ناردنی بروسکە و پەیامی پیرۆزبایی و دەربڕینی هەستە پاکەکانیان، هاوبەشیی خۆیان لەم بۆنەیەدا لەگەڵ ئێمەدا دەربڕی.

هەروەها سوپاس و  پێزانینی تایبەتیی خۆمان ئاراستەی سەرجەم ئەو حیزب و لایەنە سیاسی، ناوەندە ئەکادیمییەکان و ڕێکخراوەکانی کۆمەڵگەی مەدەنی دەکەین کە لە ڕێگەی ناردنی پەیامی پیرۆزبایی و بەشدارییان لەم یادەدا، جەختیان لەسەر پەرەپێدانی پەیوەندییەکان و پتەوکردنی پرەنسیپە دیموکراسییەکان کردەوە.

ئەم پەیام و گەرموگوڕییەی ئێوە، تەنیا دەربڕینی ڕێزێکی کۆمەڵایەتی نییە، بەڵکو متمانەیەکی مەعنەویی گەورەیە بەو ڕێڕەوە سیاسییەی "پارتی لیبراڵ دیمۆکراتی کوردستان" کە بڕوای نەگۆڕی بە ئازادی، دادپەروەری و پاراستنی ماف و ئازادییە گشتییەکان هەیە.

ئەم بەشدارییەی ئێوە بە پاڵپشتییەکی گرنگ بۆ کاروانی خەباتی مەدەنی و دیمۆکراتیی خۆمان دەزانین و وەک هاندەرێک بۆ بەردەوامبوونمان لە پێناوی خزمەتکردنی زیاتری گەل و نیشتمان لێی دەڕوانین.

 ئومێدەوارین ئەم دەرفەتە، دەستپێکێکی نوێ بێت بۆ زیاتر لێکنزیکبوونەوەی هێزە نیشتمانپەروەرەکان و گەڕان بەدوای هاوبەشیی زیاتر لە پێناوی بنیاتنانی کۆمەڵگەیەکی ئازاد و پێشکەوتوودا.

جارێکی تر، سپاسی یەک‌بە‌یەکتان دەکەین و هیوای سەرکەوتنتان بۆ دەخوازین.

پارتی لیبراڵ دیمۆکراتی کوردستان
١٨ی پووسپەری ٢٧٢٦ کوردی